何謂靚仔

昨天突然在chatroom 有人問起如何才稱得上是靚仔? 靚仔同型仔的分別係什麼?
真係唔知點答佢. 其實判定一個人是否靚仔真係好主觀, 根本冇人可以俾到一個確定的答案佢. 我記得以前會長講過, 有些靚仔可能每天都見慣自己的樣子, 所以就算見到其他靚仔, 在他眼中, 他也會認為那些人是好平凡 (因為等於望住佢自己), 反而一些其他人覺得並不起眼的人會吸引到他的注意. 這種講法, 或者可以解釋到點解有時一些靚仔型男的另一半會係...... (你們自己想像la. ^^)
到底點先係靚仔呢? 是否一定要瓜子口面? 單眼皮定雙眼皮比較吸引? 眉毛是否一定要夠粗才夠 Man? 男仔是否一定要鼻高才好睇 ?人人都有眼耳口鼻, 就算有某些部份不夠完美, 但只要整體給人的感覺是舒服 (即係順眼的感覺), 我已稱呼這些人是靚仔了.沒有人是完美的. 但我好認同某廣告商所講 "我們相信人人都可以變得更靚" 的說法. 說穿了好簡單. 一個人如果休息得好. 精神飽滿
的話. 皮膚望落去都會較有光澤同彈性 , 另外當然要整齊同乾淨, (雖然有少部份人喜愛爛澾澾的形象, 但並不代表是污糟喎); 再加上合適的髮型同打扮, 就算稱不上靚仔. 至少不會給人當作醜男, 哈哈!
我好記得以前去唱 K 時, 看到古天樂做model 時拍的MV, 老實講, 佢那時個樣真係幾得人驚. 唔知是否個化粧師整蠱佢, 搞到佢塊面白到好似成個脂粉客咁. 之後佢去了曬太陽燈, 其實只係將個膚色改一改. 馬上人人都話佢靚仔, 好型, 好Man, 重搞到其他的男明星紛紛跟風,個個都去曬燈, 都咪話唔誇張.
可能有人會講, 無論我點執都冇辦法可以算係靚仔, 咁點算好呀? 一開始我已聲明靚唔靚仔好主觀, 就算你個樣子真的比其他人稍為遜色, 你也必然會有一些令人欣賞的地方或才能; 如果你可以將你的才能擴張又或者得到別人的認同, 一定可以彌補這方面的不足.舉個例, 我本人覺得周杰倫並不靚仔. 但佢真係好有才華, 也越來越覺得佢順眼.就算好似我這樣平凡的人. 以前都曾經有個女仔同我講, 我認真工作時的樣子給她可靠穩重的感覺, 有些令佢心動喎.
大家俾心機增值下自己, 雖然靚仔的確是在好多方面較為著數, 但我始終認為一個人的內涵比較重要. 試想下, 即使俾你搵到個好靚的人做你另一半, 但佢只係得個樣, 同你可能根本溝通不來, 又或者性格不合, 又要提防佢俾其他人搶手, 都咪話唔辛苦 (雖然我不認同靚仔就一定係冇本心, 但靚仔絕對有權花心, 哈哈).

講住咁多先..下次講下身型.