突然覺得自己最近人氣急升!! 好多朋友都約我見面, 搞到自己變成一個大忙人咁. 好感謝大家都還記得我這個人. 哈哈. 最令我感到意外的是接到一些陌生人的來電, 卻原來是多年冇見的朋友. 其實真的不太記得對方是誰. 要講聲 SORRY 先.
講番正題先. 好多朋友都問我點樣識人, 又或者叫我介紹男友給他們. 也有些人覺得好難同心儀的對象溝通....老實講, 我拍拖的經驗同次數都不多. 也不太懂得點樣去拍拖, 不過我識的人都算多, 而且我鍾意聽朋友同我講關於他們的故事, 所以我也樂於同其他人分享一些經歷. 當俾他們一些參考.
首先講下如何識人. 我覺得先要了解自己是想認識朋友定係單純搵SEX OR FUN. 如果係後者. 不用我講, 大家都知可以去 BAR/SAUNA/BEACH/GYM/TOILET 等地方識到人, 就算在家中, 也可使用電腦上網. 一開 MSN, 去 CHATROOM 或瀏覽一些高人氣的 POST 相網站, 要識人真係十分之容易. 但要真正認識到知心朋友. 又真的幾困難. 例如我認識某些朋友, 和他們在 MSN 可以好好傾. 感覺好似識左好多年的知心朋友, 但和他們傾電話或約出來見面便完全不同. 好似無什麼話題好傾. 他們話唔知講什麼好, 又覺得 2 個人好似好無聊. 咁我明白有好多時候, 我們不想給對方知道太多自己的事情, 又或者和對方的喜好與及性格真係好唔同, 好難搵到話題傾. 所以我認為要識到人唔難, 但要和他人作深一層的了解, 首先要自我增值, 例知睇書和進修, 也可嚐試認識不同層面, 不同年紀的人, 相信一定可以擴闊到自己的社交圈子. 我也會留意對方出來見面時的衣著打扮, 對不同的話題的反應, 說話的方式等等, 因為以我個人的經驗. 和別人第一次見面. 除了外表重要之外, 對方也很注重和你是否夾嘴形. 如果唔好傾. 以後想再約出見的機會便少了. 所以一定要選適合的話題. 如果找不到. 寧願俾對方多少少發言. 以免講多錯多.
自我加入了本會, 真係認識了不少新朋友, 也有好多人知我識得唔少人, 叫我介紹對象給他們. 其實我覺得有些為難. 不是我不想介紹. 我也試過成功地攝合了身邊的朋友一齊. 但我唔想日後俾他們怨我介紹錯人俾他們認識. 到時我都唔知企在那邊好. 我覺得如果想識朋友的話, 可以搵我幫手, 因為我也會幫下眼, 搵一些應該同他們夾的人. 但如果係 lover, 我覺得最好都係自己揀, 大家看人的角度都唔同. 我認為他適合, 並不代表真的適合你嘛. 所以我會建議他們多些來本會搞的活動. 哈哈.
講到同心儀的對象相處. 其實真係一門學問, 要講, 真係可以好長篇大論. 首先舉一個例子. 我有個朋友, 佢本來同佢 lover 相處都幾好. 但最近突然同我講佢地做番朋友. 原因係相處越耐. 大家越了解對方, 就發現原來好多生活上的習慣好唔同. 若再繼續拍拖, 只會增加大家之間的分歧. 要分開還是一齊是他們2個人的事. 我也不想也不應評論. 但我真的覺得好突然. 點解原本咁登對的一對, 大家都投入了的一段感情. 就咁完結了. 是大家不想再傷害對方, 還是有緣無份呢. 舉多一個例子. 有個朋友在電話同我講, 佢覺得自己好傻, 佢識了一個人, 也向那個人表白了. 還相約那人食飯, 但那人失約又無回覆是否出現. 令到他白白等了一段時間. 佢話自己好易鍾意人, 也好容易投入一段感情. 但每次都搞到自己好 hurt. 我聽完之後同佢講. 你真的好傻, 但容易喜歡人和投入感情並不是問題. 只係要明白, 好多事情是要有時間上的配合的. 我以前也好容易鍾意人, 也試過多次一見鍾情. 但隨著年紀的增長, 加上認識的人多左, 我覺得即使遇上心儀的對象, 也要多少少時間大家相處, 真的適合才好發展. 好多人同我講, 如果找到合適的唔要, 會給其他人搶走, 又話如果太耐唔行動, 會冇左那種 feel. 我覺得如果你真係鍾意佢, 點會好快冇左 feel. 咁快冇 feel, 只係証明你唔係真係咁鍾意佢. 而且要發展感情是要雙方面和時間去建立. 太急進只會快來快去.
最後. 想講下同 lover 相處的少少意見. 我好多時會問其他人, 他和 lover 隔幾耐會見一次. 如果唔見面會用什麼方式保持聯絡. 問出來的結果其實冇準則. 有些人一星期見1次, 有些人2-3次, 有些接近日日見, 但也有些一個月甚至幾個月先見一次. 另外, 如果唔見面. 有些人會一日幾次電話或者SMS, 也有人只靠和 lover 用電郵或 msn 保持聯絡. 當然也有人選擇和 lover 同居.
其實見得頻密與否並不重要. 我覺得最重要有交流, 我有個朋友日日和 lover 一齊食早餐, 日日都見, 但這種見面. 我唔覺可以增進他們的感情. 不過也有好多人認為起碼可以見多幾面.
又有一些人好緊張自己個 lover, 我認為是過份關心. 每天都打幾次電話問對方做緊咩. 食緊什麼之類. 老實講. 我們的日常生活都離不開好公式般的返工返學. 基本上日日都係差不多. 如果有人日日都打俾我, 問我今天做左飯未. 起初我們覺得好sweet, 也會好感激那個人好關心我. 但日日都係咁..難道冇其他事情可以同我傾咩. 我覺得應該尊重對方. 俾番 D 私人空間同時間佢. 見唔面並不代表唔愛佢, 反而日日見我會怕冇話題. 間中見佢, 我會好 miss 佢. 也會更加珍惜佢. 沒有約佢的日子. 我會計劃下次見面的節目,或者準備一些小禮物, 我不是每一次都要俾到驚喜佢. 只是想佢知道我有幾咁在乎佢.
講到尾. 你如果真心鍾意一個人, 你會用好多方法遷就佢, 討好佢. 但要記住. 太過勉強自己改變去就對方, 並不是一個長久的相處之道. 你們應該要互相配合. 找出一個大家都覺得舒服的方法去相處才是最好的.
